SIPLOH NYANG RAEK TANDA QIAMAT
NABI MUHAMMAD MEUNAN MEU SABDA
‘ÖH TROH H’AT WATEE KATOE QIAMAT
NEUBRI ALAMAT SIPLOH BOH TANDA
TANDA ANG KEUPHÔN NABI HAREUTOE
RATA JEUT NANGGROE KAYÉM THAT GEUMPA
TANDA KEUDUA MEUNAN CIT BAGOE
RATA JEUT NANGGROE JI ÉK IE RAYA
TANDA NYANG KEU LHÈE WAHÉ DUM KAWÔM
KEUDÈ DUM TUTÔNG DUSÔN NGÖN KUTA
RATA JEUT NANGGROE TA DEUNGÖ TUTÔNG
KUTA NGÖN GAMPÔNG HABÉH SEUREUPHA
TANDA NYANG KEU PEUT WAHÉ DUM ADOE
RATA JEUT NANGGROE JEUT PRANG SAUDARA
KAPHÉ NGÖN KAPHÉ HANA REUDA PRANG
UREUENG ISLAM PIH SAMA SAJA
TANDA KEULIMÖNG WAHÉ DUM RAKAN
RATA JEUT SIMPANG KEUDÈ MEUBANJA
KA TEUDONG KEUDÈ RATA JEUT SIMPANG
MEUKAT MAKANAN PEUE PEUE NYANG HAWA
TANDA NYANG KEUNAM WAHÈ DUM SAHBAT
DILÈE GASIEN THAT JINOE KA KAYA
YÔH MASA DILÈE JIH MEUTÈNG PANÈNG
JI GEUBEUE KAMÈNG BAK UREUENG KAYA
JINOE KA KAYA HAREUTA LE THAT
RUMÖH MEUTINGKAT JIDUEK KEURETA
TANDA KEU TUJÔH HAI BUNGÖNG SIRON
KAYA BAROKON JINOE KA PAPA
HABÉH HAREUTA BLANG DEUNGÖN LAMPÔH
CIT TINGGAI TUBÔH HUDÉP SENGSARA
TANDA KEU LAPAN NEUKHEUN LÈ NABI
UREUENG ÈK HAJI RAMÈ LAGOINA
RAMÈ MEULEUPAH UREUENG ÈK HAJI
LADÔM PÈNG SUCI LADÔM PÈNG RIBA
SEUBAB JIH KAYA BAK CUKONG JUDI
MEUTAMAH LAGI AGÈN BAK CINA
NACIT NYANG KAYA BAK AGÈN CANDU
LADÔM BU BULEUEN PUASA
ASAI KA KAYA LAJU U MEUKAH
BATEUE DEUNGÖN SAH HANA JIKIRA
TANDA SI KUREUENG LEUPAH GOT RAGAM
INÖNG NGÖN AGAM HANA LÉ BEDA
INÖNG SÔK LEUWEUE AGAM PANYANG ÔK
SAPEUE THAT ANGGÔK SABAN KEUNIRA
‘ÖH DIJAK DUA TANGIENG BAK JALAN
HAN MEURI AGAM HAN MEURI DARA
TANGIENG SI LEUWEUE SANG ANEUK AGAM
TANGIENG ÔK PANYANG SANG ANEUK DARA
TANDA KEU SIPLÔH NABI RIWAYAT
RAKYAT MEULARAT DUSÔN NGÖN KUTA
RAKYAT BAN KAMÈNG IKAT LAM UROE
PEMIMPIN NANGGROE JUWAH BAN SINGA
ÖH BACUT SALAH RAKYAT LAM NANGGROE
BAK BAJÈE BEUSOE YUE TROM JITAMPA
UREUENG NYANG MEUKAT LEUPAH THAT PALAK
KAJICOK PAJAK MEULIPAT GANDA
RAKYAT BAN MANDUM HAN JEUT LÉ MEUGRAK
JITROM JI SIPAK MASÔK PENJARA
MANDUM TA TURÔT LAGÈE JIPEUGAH
BEUTHAT BEUSALAH HAN JEUT TADAWA
SOE SOE NYANG TEUNTANG LAGÈE JIPEUGAH
KEUNÖNG BEUREUKAH TAMÖNG PENJARA
BAN MANDUM RAKYAT HAN TEUHAH BABAH
LAGÈE KAMÈNG GRAH DALAM UROE KHA
NIBAK MASANYAN HAN ÉK SOE PIKE
ULAMA JAHÉ MASANYAN TEUKA
ULAMA JAHÉ LEUPAH THAT KAPLAT
HADIS NGÖN AYAT DI TUKA TUKA
BAK HADIST DHA’IF SINAN JI MEUDONG
LAÉN MANDUM KON HAN DI PEUCAYA
ULAMA JAHÉ LEUPAH THAT DEUNGKI
SABÉ DI CACI ALÉM PUKAHA
UREUENG PESANTREN DI PEUGAH SALAH
WATÈE KHUTBAH DI THOK – THOK DADA
JIPUEGAH HUKÔM NYANG SALAH SALAH
JIMITA MEUGAH BAK UREUENG DÔNYA
‘ÖH NOE KEU HABÈH TANDAN NYANG SIPLOH
ALÈH CIT KATRÔH CUBA PEUNYATA
NYANG KARANG SYAIR CHIK TANOH ABÈE
BAK THÔN SIRIBÈE LAPAN REUTÔH DUA